炊豕店 (曉悅) (已結業)

最近有個朋友轉咗工，而家喺荔枝角返工，於是今日就攀山涉水過咗去荔枝角搵佢食飯傾吓偈，大家對嗰頭都唔太熟悉，誤打誤撞就入咗去呢間炊豕店。入面嘅座位相對地算寬敞，裝修亦不花巧，牆上面就標明呢度係主打食豬嘅菜式。主打都係食豬扒，定位清晰，好適合呢區返工嘅上班族嚟幫襯。點餐紙上見到有一款叫大阪燒豬扒飯，一於就揀呢款。豬扒上充滿大阪燒醬汁同埋木魚絲，充滿大阪風味，另外加$10加配厚切午餐肉。呢度嘅豬扒果然名不虛傳，豬扒屬於厚身豬扒，表面炸得外脆而肉質內軟，而且都好大件，真係足以餸晒成碗白飯。而加配嘅厚切午餐肉亦絕不欺場，目測超過1cm厚，而且係屬於中上質素嘅午餐肉，所以都值得加配。雖然呢度主打豬扒，但都想試埋其他嘢，所以令一份餐就揀咗要豬軟骨，諗住豬軟骨有汁，所以就揀咗配粗麵，果然呢個配搭真係冇得輸，而且仲有蓮藕、蘿蔔、蔬菜等配菜，非常豐富！習慣點都叫返個小食，就清清地揀個肉燥凍豆腐，上面同樣地加咗大量木魚絲，配合肉燥醬汁，食起上嚟就唔會太寡。埋單時發現有九折，原來依家係新張期間，堂食全單有九折，優惠唔知幾時完，要趁未完嘅時候再嚟過。