Kcal

營業中

休息中

原本諗住覺得的野好食所以上黎分享下，又估唔到呢間野都有咁多唔好既評價，真係相當意外。唔知係咪夜晚唔同人做啦，我見好多唔好既評價都係夜晚既，但係日頭我就覺得係質素保證，次次都咁好食，至少佢既食客比隔離兩間餐廳多成倍...環境方面係迫既，唔駛懷疑，人多既時候基本上係背對背，不過又唔係迫得好過份果隻，都會有的elbowroom，仲ok。味道方面好好喎，我對上一次食左個炒意粉，雖然係濕濕地既，但如果你唔係expect佢好似乾炒牛河咁，我又覺得ok囉，而今日食左個咖哩雞扒焗飯，塊雞扒脆得黎又唔肥膩，相當好食，咖哩就淡口的，唔似我鍾意既茶餐廳咖哩咁濃，但係都好食。有幾樣野值得提：第一係佢地既麵包相當好食，芝麻包、蜜糖包、小法包...全部都香噴噴，外脆內軟，唔可以放過。其次係羅宋湯，唔似茶餐廳既羅宋湯咁酸咁冇誠意，佢地既湯料切到細細件，而個湯亦唔係好酸，連平時唔飲羅宋湯我都覺得好飲。第三係芝士粉，可能我少出去食，我未見過問侍應要芝士粉，佢係成舊芝士拎出黎刨粉比你，見過既朋友唔駛理，未見過既朋友下次可以試下。服務普通、環境乾淨，我覺得以呢個價錢食到咁既野係物有所值。