九運來粉麵世家 (已結業)

做完Treatment到中午，又未食早餐，醒起有間新開嘅粉麵舖，就過嚟試吓。原來仲做緊$20一碗牛腩粉。入到去唔算多人，可能星期六中午時間，啲位任坐。天氣咁鬼熱，梗係有幾入坐幾入啦。本身諗住嗌小食，但係都係試吓佢咩料子先，所以嗌咗個牛腩河，落單嘅時候想叫杯凍檸茶，不過霸氣侍應就話一碗粉$20飲品正價。既然佢咁霸氣嘅話，我就唔飲啦。個牛腩河送到嚟嘅時候，其實都無咩要求。不過個賣相都幾特別，所以要影低佢，雖然$20 ，但係嗰份嘅份量都好多，本身都有諗過好唔好再嗌多碗粉，但係食咗一半已經飽飽地。啲牛腩都好好，唔係剩係得啲全瘦都有少少肥，試吓個湯底都清甜，如果食得辣嘅朋友，可以試吓埋佢個蒜蓉辣椒醬，唔係好辣，但係食到一半嘅時候再加埋落去又開胃咗。食碗粉就唔好諗住要啲咩服務質素，以食物嚟講，都係值得encore之選。試次用餐是全數自費的。