尚海人家 (英皇道) (已結業)

呢日去北角上堂，放工後四周圍行吓同買啲嘢食返屋企。近炮台山有間外賣小店散發住煮食嘅香氣♨️，之前行過都唔覺「尚海人家」嘅出現，估計應該係新開。女店員熱情招待，以外賣店嚟講好難得。佢推介一定要試招牌生煎包，而且嗌套餐比較抵食👍。我買咗兩個餐，埋單都只係$100，份量仲要幾多，感覺相當唔錯☺️。餐碗設計將飯麵同餸料分開，咁就能更有效保持食物質素。皇牌生煎包(原價$28/4隻)，🥟生煎包唔算好大個，不過就煎得幾靚仔，頂部脆薄唔燶，並配合埋芝麻同葱，香味撲鼻。不過講到最抵讚嘅地方係佢咬落爆晒汁😍，肉味濃郁，好食。排骨蔥油拌麵(原價$40)，排骨即係炸豬扒🐷，豬扒足一整塊，望落好似有啲乾身，但食落非也，而肉質仲幾嫩添。🍜蔥油拌麵都OK，麵條分明，質感煙韌，蔥油亦無過重草青味。醬滷牛肉菜飯(原價$40)，呢個飯就屬正常發揮啦，但略嫌餸量比較少，不過都惹味嘅🐮。菜飯係傳統上海菜式，米飯夠軟熟，如果油香重啲會更正🍚。題外話，裝生煎包嘅外賣紙盒幾靚，印有老上海風情🇨🇳。總括嚟講，呢間上海菜外賣店幾好🥢，味道不俗，價錢大眾化，而且上海嘢又唔係四周圍都有得食，下次經過我都會再幫襯啊😉。