稻香 (藍天海岸) (裝修中)

送假同屋企人去稻香飲下午茶，貪佢所有點心（包括特點、大點、中點同小點）都有半價，好抵！三個叫咗好多點心🥳叉燒酥：好酥脆又熱辣辣，一咬落去聽到嗦嗦聲，證明真係好脆，不過就有啲油。櫻花蝦薄罉：最中意食薄罉係因為佢煙煙韌韌，側邊又脆卜卜。但估唔到今次個薄罉咁真材實料，咁多櫻花蝦，好熱、好香口好好味。叉燒腸：又係新鮮出爐，啲腸粉好滑，叉燒都算多。燒賣：好大粒爆晒汁，差啲辣親個口。另外，鮮蝦好爽口，好味。金錢肚：份量比想像中少，有50%都係墊底嘅芋頭，不過啲芋頭都好粉好入味。金錢肚啲一格格沾滿咗啲沙嗲汁，辣辣哋好惹味。煎堆仔：芝麻味好香，出面個煎堆皮同入面啲芋頭蓉都好熱，兩樣夾埋好好食。鳳爪排骨：唯一一個麻麻地好食嘅點心。鳳爪無乜問題但啲排骨好羶。