億饍 (已結業)

今晚同個frd食晚飯，自從佢做手術後，都有兩個月無見。今次去咗一幢新開專門食嘢嘅大廈食飯，我最鍾意食亞洲菜，見到哩間乜嘢菜都有啲就食哩間。我哋叫咗個$288二人餐，生蝦，同燉湯！套餐有沙律，串燒，雞翼，炒飯，炒蔬菜，甜品同飲品，都幾抵食！柚子鮮蝦沙律味道好清新，酸酸甜甜好開胃，蝦亦新鮮。生蝦刺身平時出邊用碟上，哩度就用聖杯上，而且啲蝦夠凍又夠新鮮爽口，個汁亦都好好味！不過平時食開果啲蝦肉上會附上蒜頭，而哩度仲會附上埋辣椒粒，一齊食都幾辣！茶樹菇排骨燉湯好彩只叫一盅，都幾大盅，同個frd一人一半剛剛好，而且好足料！蒜香牛油雞翼,同串燒味道OK，但無乜特別。蟹肉炒飯都算多蟹肉，而且有芒果一齊炒，所以無咁滯，同場炒飯偏乾身，唔油膩。原本要馬拉盞炒芥蘭，但賣晒，所以揀西蘭花，味道唔錯，唔會太咸。其實已經食到勁飽，但仲有甜品未食，好彩個黑糯米份量唔多，兩三啖就食晒，而且味道幾好。總括嚟講哩間餐廳性價比高！值得encore！鍾意食中西泰越菜嘅朋友可以嚟食，滿足唔同口味！不過間嘢都幾full...晚飯時間爆場！