阿來泰式地道風味

營業中

休息中

聽朋友講，阿來泰式係香港最好味抵食嘅泰國餐廳。今日就決定試吓阿來泰式，睇吓朋友有冇講大話！牆身餐牌有英文同泰文，非常地道。我哋總共叫咗五個菜式，首先係冬陰公湯。雖然叫咗細份量，但我同女友都各飲咗兩細碗，配料亦非常充足，蝦都有三大隻，湯底甜甜地唔會太辣，啱晒我呢種鍾意食泰國菜但唔食得辣嘅人。今次係我第一次食泰式肉碎生菜包，清爽既生菜平衡返肉碎嘅鹹味。肉碎份量好多，如果叫飯，撈埋一齊食實好正。椒鹽軟殼蟹係我食泰國菜多數會叫嘅菜式，一上菜已經聞到好香嘅椒鹽味，食落唔會滿口油，下過食唔到有太多肉，有啲可惜。泰式小食拼盤有四款「炸4」小食: 炸雞翼炸蝦餅炸魚餅炸春卷。每一樣都非常香脆，我非常鍾意春卷入面嘅餡料有粉絲，口感更加豐富。雞翼牛油味非常香，整體十分不錯。Suki炒粉絲嘅粉絲吸晒啲辣汁，食落雖然好辣非常過癮。旁邊亦有通菜，炒蛋，賣相麻麻，但味道搭救。五道菜加埋兩杯飲品都係每人$250左右。每一道菜嘅份量非常大，我朋友果然冇介紹錯，的確係香港抵食嘅泰國餐廳。