大勝丼 (已結業)

去大勝丼食嘢需要有啲耐性，除咗等位耐之外，即使有幸坐低咗，由於店員實在太忙，要有心理準備想要杯水都可能要等到地老天荒😆，證明佢哋有幾受歡迎。受歡迎嘅原因係性價比高，例如我叫呢個自選丼飯，有大大 pat 蟹膏，甜蝦，北寄貝同三文魚腩，隨餐仲附送味噌湯同雪米糍，夾埋都係百鬆啲蚊，認真大件夾抵食👍。味道方面，魚生都幾新鮮，特別係蟹膏，好鮮甜，絕對對得住呢個價錢。另外想讚一下碗味噌湯，非常好飲😋，唔似一般舖頭咁用湯粉沖出嚟。對面位叫咗個角切魚生便當，包括三色刺身，沙律，炸蠔同角切魚生飯，又係大大份，我試咗嚿炸蠔，炸得外脆內軟，熱辣辣，好食。最後仲叫多兩個小食，炸蟹肉奶油薯餅好 creamy，有啲膩，日式清酒煮蜆雖然份量比較少，但係隻隻肉質鮮甜入味，好正🤤。總括嚟講，就係好滿意嘅一餐😌。