湯火功夫麻辣燙 (已結業)

我在銅鑼灣逛街，行到肚餓好想食麻辣，但同行朋友食唔到辣，咁點算好呢？好彩俾我搵到間有麻辣湯底同蕃茄湯底嘅鋪頭，名叫湯火功夫，一次過就滿足晒我哋兩個唔同嘅要求啦。餐廳嘅點菜模式係一入到去坐低，店員就會比客人每人一張點菜紙，由客人自行選擇湯底、蔬菜、肉類、麵和飲品，配料嘅選擇數量都係由客人自己話事。我選咗招牌麻辣湯湯底，加小辣和中麻，會揀咗通心菜、莞茜和滷水雞中翼，麵底選咗米粉，加凍奶茶。朋友選咗蕃茄湯底，走麻走辣，配料選咗火腿、唐生菜和薯仔片，麵底選咗薯粉，加凍檸茶。我覺得兩個湯底都好正，招牌麻辣其實唔算太辣，下次可以挑戰中辣，麻嘅味道非常好，我好鍾意。蕃茄湯底好濃郁，好鮮甜。麵我會推介薯粉，真係好滑好煙靭。配料方面雞中翼好味，菜都好新鮮，朋友話薯仔片好正，火腿係用厚火腿，仲要有成三四塊，好抵食。凍檸茶凍奶茶嘅味道都唔錯，凍奶茶係港式嘅味道，正呀！