蚊蚊豬老火鍋 (已結業)

蚊蚊豬火鍋係我一諗起麻辣火鍋，就會想食嘅一間。🌶️🍲早幾次都係去太子分店，今次試吓深水埗嗰間質素如何先。今次叫咗個120分鐘任飲任食極品晚市放題，呢個放題係可以先揀咗食雞煲或者烤魚，食完之後就開始打邊爐。今次同埋屋企人就揀咗先食雞煲，雞煲一上枱就聞到好香麻辣味🤪屬於炒得香口嘅雞煲，唔會落過多嘅水。連埋雞皮食，正！火鍋我哋揀咗鴛鴦湯底，招牌牛油紅湯鍋同埋香莤皮蛋鍋。兩個湯底都好滿意，紅油鍋淥牛肉一流🥩皮蛋鍋就岩淥啲時蔬🥬，冇咁吸油。好欣賞呢度既響鈴 新鮮油炸，超級香口好食🤩仲有一開始會上枱既牛肉拼盤，啲牛肉都好不錯。有極上牛肩嫩肉、封門柳、牛板腱同牛舌，好快就清盤🥓呢度嘅小食都有勁多選擇，有幾款嘅魚生刺身，串燒，麻辣涼拌嘢都有😍連特別啲既涼拌魚皮都有，個人最欣賞就係佢嘅燒豬頸肉，超級香口，入口軟熟既質感！