嫲嫲辣辣 (福榮街)

營業中

休息中

通常鍾意食辣嘅人都會鍾意食川菜，我都唔例外，特別鍾意食麻辣干鍋。今日lunch去左嫲嫲辣辣食麻辣干鍋。$69有得揀麻辣、香辣，孜然或者蔥爆（唔辣）。仲有得揀三個餸，揀肉或者菜都得。包埋一碗白飯同埋一罐汽水/一杯豆漿。香辣干鍋（大辣）一黎到見到lunch set嘅香辣干鍋都有咁大份有啲驚訝。揀左牛肉、雞軟骨同埋西蘭花。西蘭花有大約四五舊，索曬所有香辣味，同白飯好夾。雞軟骨好正！一定要再叫！有好多粒，每粒都好好食。牛肉ok正常。香辣鍋底好正。麻辣干鍋（大辣）有超多花椒，麻辣味十足。雖然大家都係大辣但好似辣過香辣好多咁。但冇香辣嘅味道咁豐富，所以都係香辣正啲。揀左牛肉、雞件同埋紅薯粉。紅薯粉係扁身闊嘅，口感唔錯，成條都係麻辣味，但如果配香辣應該會正啲。雞件唔錯，但得四舊仔左右。牛肉都有幾多塊。因為好開胃所以不知不覺間食曬，一停低發現飽到上心口。叫左一罐可口可樂同埋一杯豆漿，都幾驚訝豆漿竟然都幾細杯，不過都幾解辣。下次再黎應該會叫返香辣大辣、雞軟骨、西蘭花，再加一個未試過嘅配菜。