影片
更多
2010-05-17
14 瀏覽
兩星期前師傅同有幸同食神嫂同埋佢另一個朋友食飯, 地點原本係山林道某間燒烤店, 當入到去門口, 報上人數時, 個知客話冇位, 但當時店內並不客滿, 仲有枱添, 當大家都覺奇怪之際, 個知客突然爆左一句“廚房好麻煩”! 嘩, 呢一句頂癮囉, 三個人笑到牙都甩, 最後連響朵都無效, 於是食神嫂就帶大家去另一間食店! 同一條街大家都係燒烤店, 報上人數後就被安排坐於吧枱, 其實一入店內師傅第一時間就想起梁詠琪, 何解? 因為“全食店煙霧彌漫, 時剌激時也心煩……” 由於當時冇其他坐位, 於是就唯有忍一忍! 坐底後就即刻劃野食, 劃完野食後大家就喺度吹下水! 但由於油煙真的太勁, 師傅恐防用幾包面油紙都唔掂, 前後要求左幾次先可以轉到隔離鋪位, 其實唔係佢唔肯轉, 只因當初隔離鋪都滿座! 轉左位後就正式開餐, 師傅當時唔知叫左d咩食啦, 最後經統計後係柯打左十五款食物, 有燒豬頸肉, 燒芝心丸, 燒牛仔骨, 燒牛肩肉, 燒粟米, 燒茄子, 燒白蟮, 燒廣島蠔, 燒雞肉腸, 燒羊架, 燒雞翼, 燒牛舌, 蒜蓉包, 炸蟹蚶同埋燒墨魚丸!先講下燒豬頸肉, 豬頸肉一串有五件, 入口非常之爽, 而且一
同一條街大家都係燒烤店, 報上人數後就被安排坐於吧枱, 其實一入店內師傅第一時間就想起梁詠琪, 何解? 因為“全食店煙霧彌漫, 時剌激時也心煩……” 由於當時冇其他坐位, 於是就唯有忍一忍! 坐底後就即刻劃野食, 劃完野食後大家就喺度吹下水! 但由於油煙真的太勁, 師傅恐防用幾包面油紙都唔掂, 前後要求左幾次先可以轉到隔離鋪位, 其實唔係佢唔肯轉, 只因當初隔離鋪都滿座!
轉左位後就正式開餐, 師傅當時唔知叫左d咩食啦, 最後經統計後係柯打左十五款食物, 有燒豬頸肉, 燒芝心丸, 燒牛仔骨, 燒牛肩肉, 燒粟米, 燒茄子, 燒白蟮, 燒廣島蠔, 燒雞肉腸, 燒羊架, 燒雞翼, 燒牛舌, 蒜蓉包, 炸蟹蚶同埋燒墨魚丸!
先講下燒豬頸肉, 豬頸肉一串有五件, 入口非常之爽, 而且一d都唔油膩, 味道都不錯, 可以喎; 燒芝心丸一串有四粒, 外面燒到脆脆地, 入口十分彈牙, 加上內裡芝心甚香濃, 真係好有 “巴拔橋”嘅風味; 燒牛仔骨冇咩特別, 但勝在肉質鬆軟, 有肉汁唔乾身, 所以都不賴; 燒茄子一串有三件, 唔知點解師傅覺得佢個茄子燒得好好食, 除左冇茄子本身會有“賴口”外, 燒得一d都唔乾身而且味道甚佳, 作為中和過多肉類亦係一個不錯選擇, 掂喎!
燒雞肉腸係一道非常簡單嘅菜式, 但不知點解仍是非常出色, 雞肉腸唔會過咸, 應該燒之前出過下水, 加上燒得甚香, 外面塗滿厚厚嘅蜜糖, 完全好似平時自己燒野食咁, 好得; 燒牛肩肉一串四件, 肉身乾少少, 但不至於老, 呢個冇咩驚喜; 燒粟米師傅冇食到所以不便評論; 燒白蟮燒得洽到好處, 唔會太老太乾, 而肉質鬆軟, 加上冇腥味同冇骨, 同場食神嫂亦叫好!
講左咁多樣好似樣樣都得喎, 不過以下落黎呢兩樣堪稱令人失望, 先講蒜蓉包, 蒜蓉包嘅包係十分之腍, 少少脆都冇, 加上好韌, 師傅就真係唔多欣賞; 而呢道最出名嘅燒牛舌亦同時令人失望, 不止師傅, 連食神嫂都話差, 燒牛舌一串四片, 牛舌本身片得都幾薄, 但薄身唔係問題, 最大問題係入口唔爽, 師傅覺得燒牛舌唔爽同食魚蛋唔爽都冇咩大分別, 就係唔爽, 不過唔爽都唔在講, 最弊就係好油, 成口都係油, 著實好差; 雖然有同食店反影, 但食店話可能性不大, 仲堅持牛舌每日係只賣十串, 莫非師傅嘅係第十一串?
雖然牛舌甚差, 但燒廣島蠔堪稱全夜代表作, 亦一定係師傅嘅必食推介, 燒廣島蠔一客有四隻, 蠔唔算話好細隻, 應該屬於中等身型, 入口肉身肥美鮮甜, 而且燒得啱啱好, 唔會過生或過熟, 十分之有功價; 燒羊架一客兩隻, 羊架鬆軟酥香, 燒得一d都唔乾身, 不錯; 燒雞翼一客三隻, 雞翼燒得幾香, 入口後發覺肉身唔夠滑, 可能係師傅奄尖, 不過勝在唔乾身, 所以亦屬合格! 炸蟹蚶不過不失, 蟹蚶內蟹肉甚多, 所以味道幾香, 加上炸得唔油, 可口; 燒墨魚丸兩個字形容, “香, 爽”!
總括黎講燒烤水準尚算出色, 主店地方煙霧彌漫, 如果坐喺度食真係好似喺廚房食一樣, 轉過隔離店雖然簡陋,但至少坐得舒服, 服務都友善, 價錢唔貴, 埋單每人百六, 但食得非常之飽! 雖然現今燒烤店成行成市, 但有心做而且做得出色真係冇咩幾多間, 所以師傅衷心希望呢間食店加油, 亦建議食店更新抽風系統, 如果唔係就等如趕客; 是次笑臉係一定要比, 有機會一定會再黎, 淨係食隻燒廣島蠔已經值回票價!
張貼
