原藝

營業中

休息中

星期五晚同老婆拍拖，上網見到呢度由藍帶廚師主理嘅新分店，揸車嚟好方便，又有泊車優惠，但坐地鐵比較難搵；其實餐廳在女青年會內。裝修都有少少文藝元素，餐廳面積唔算大，訂咗位才來比較穩陣因為附近無其他餐廳！餐牌都有唔少嘅選擇，由平至貴悉隨尊便。紅椒忌廉湯好彩唔係好辣，小小辣增加湯嘅層次感，亦減去膩的感覺，蒜蓉多士水準超高。蒜香雞翼皮脆肉嫩，煎炸有水準，蒜蓉味香氣吸引。黑松露忌廉帶子闊條麵擺設有心思，四隻帶子向唔同嘅方向中間再加個沙律菜，帶子煎嘅火候剛剛好，保持中間嘅嫩滑，忌廉汁唔會太濃味，濃淡比例適中。香煎鴨胸配血橙醬亦顯示出廚師控制火喉的水準，中間位置剛剛熟，鴨肉唔會韌，而佢哋應該揀咗一啲好靚嘅鴨胸肉，皮好薄唔會太肥。本來都已經好飽，但見到佢哋嘅甜品全部現場即製，賣相亦好吸引，忍唔住叫多個甜品試下。天鵝仔外型嘅朱古力黑茶慕絲最吸晴，天鵝翅膀同埋頭都係白朱古力，佢地話慕絲蛋糕係由幾種75%以上朱古力混合而成，有豐富層次口感亦唔會太甜。