九鼎記粉麵世家

營業中

休息中

九鼎記粉麵世家📍旺角彌敦道575號地舖晚上經過彌敦道被呢間粉麵世家招牌吸引住，一個牛頭形招牌寫住九鼎記，再喺玻璃窺探見到一大煲牛腩牛什，口水差啲流出嚟，就同朋友入咗去，入去問師傅有咩好嘢，師傅介紹有牙就雙沙河，即係崩沙腩同牛沙瓜，牛沙瓜聽就聽得多，終於有機會喺旺角鬧市試到，朋友嘅選擇困難症比我更嚴重，睇餐牌五分鐘仲未揀到，我提議佢食招牌八寶河，朋友非常樂意但要幼麵。牛沙瓜口感特別有啲爽口，需要咀嚼但唔係韌更加唔係硬，係咬得斷，值得一試，崩沙腩係牛腩最靚部位，肥瘦均勻有筋膜連住軟腍味香。八寶麵唔使多介紹，有牛腩、金錢肚、牛筋、魚皮餃加四種丸，真正一個價錢八種享受。仲有炸雲吞即叫即炸，雲吞皮係有啲鬆脆嗰隻脆皮口感，包住豬肉同蝦仁鮮得嚟有肉香。炸墨魚丸炸到金黃表面，彈牙之餘仲有墨魚粒多重口感。粉面湯底唔算好濃，反而突出主材料嘅味道，而且價錢經濟實惠，例如雙沙河同八寶麵各自都係六十多圓，崩沙腩河更係五十幾蚊，性價比高。最最最重要個辣椒油超級香，辣度更加係唔講得笑，一定要試。