自家點心 (已結業)

早兩日睇報紙，見到呢間野好似幾OK，一心諗住去試試，星期五朝早10：30左右去到，見到鋪仔細細，裡面坐滿晒人，跟足規矩同店員攞張飛，喺鋪頭出面等，後面有個阿嬸跟住攞飛，即係排喺我後面。等左15分鐘左右終於有人走，心諗應該有位啦，點知後面個個阿嬸同兩個阿伯即刻衝入鋪坐低咗，但係店員若無其事咁繼續執檯，見到咁嘅情況，梗係要入去同店員理論啦，點知店員好唔好聲氣咁話：「佢地訂咗位架，你地攞飛嘅就等多陣啦」嗰個阿嬸訂咗位？咁佢一開始做乜要攞飛？聽到店員咁嘅答覆，真係火都黎埋，最後無食到就走咗。就算佢好食到識飛，咁樣嘅服務質素，你又會唔會幫襯？