臨家麵館

營業中

休息中

今日同男朋友去荃灣上堂，上堂前拿拿臨去食個快lunch，行過見到呢間主打食麵嘅餐廳就諗住入去試吓。間餐廳望落啲裝修好新淨，睇嚟應該開業無耐，我哋嗰日大概12點幾入去，個場大概坐滿一半人，點知我哋一叫完嘢食無耐，我哋坐嘅四人枱都要搭枱，全場爆滿😂餐廳主要就係有麵食同埋唔同嘅小食，麵就有一啲酸辣湯、蕃茄湯同埋沙茶麵等等。見佢招牌主打沙茶麵，我同男朋友就分別叫咗個醬滷大腸沙茶麵同埋肥牛沙茶麵試試，而麵底我哋就喺幾款面入邊揀咗台灣麵😋兩個麵嚟都算幾大碗，而且賣相都唔錯。先試個湯底，雖然唔係好杰，但就好香濃沙茶味，啲餸嘅分量亦算多，大腸好咬口幾爽，有啲脂肪但又唔會好肥膩，男朋友嘅肥牛我試咗一舊都唔錯，唔會煮得太老，而個台灣麵底都算唔錯，煙靭有咬口同索湯👍🏻我哋除咗叫麵之外，都另外叫多咗兩個小食，鹽酥雞同埋崩沙腩，而崩沙腩作為Menu入邊最貴嘅小食，果然冇令我哋失望，橫膈膜位置，軟腍味香，肥瘦啱啱好，而且牛味夠濃又香😋至於個鹽酥雞就好有驚喜，份量多之餘炸得亦好金黃，睇得岀係啱啱炸起，仲鎖住到啲汁，同時又唔會油淋淋👍🏻 整體嚟講依間麵館嘅性價比都好高，可以再戰😉