川燒 串燒·酒埸

營業中

休息中

今日下午過咗銅鑼灣逛逛，黃昏時候肚餓搵嘢食，上網睇睇有間新店喺鵝頸橋附近，位於駱克道嘅《川燒·串燒·酒埸》新開，交通方便，銅鑼灣鐵路站出，行一陣就到喇。早早地食飯唔使同人逼，仲有happy hour啤一啤，串燒種類豐富，牛羊豬雞，特色嘅串燒都有好多選擇。Happy Hour生啤買二送一幾抵飲，Santorum Premium Draft Beer。黑松露燒腐皮溫泉玉子~食落唔錯，腐皮即係個大豆卜，脆脆地，玉子夠香，黑松露味道唔會搶曬啲味；燒黑豚芝士五花腩~香口嘅五花腩配芝士係今晚邪惡之選，夠肥美；燒特級厚切牛脷~呢個真心燒得唔錯，一啲都唔韌，咬落好juicy；燒日本豚肉腸拼盤~黑椒腸、芝士脆皮腸、脆皮腸、豬肉腸， 各有特色，腸腸係我嘅至愛；川香肉碎燒茄子~本身肉碎唔算好辣，茄子去皮燒，方便入口；日本炸池魚仔~即叫即炸，香口脆卜卜，送啤酒最啱；炸麻辣雞軟骨~再來下酒菜，加咗少少麻辣味；蜀都炒飯~呢個要讚下師傅，炒得香好唔肥膩，粒粒飯會跳，加咗辣炒，味道比較辣。越夜越多人，想坐特別位置，大家記得book枱啊！