麥當勞

營業中

休息中

早排喺隧道口見到麥記話「有好椰」嘅廣告，都估到同「椰」有關。早幾日終於見到新廣告原來出新品「厚椰奶鐵」，特別鍾情椰嘢嘅我梗係要盡快去捧場啦！新品有凍有熱，凍嘅就係 Iced Coconut Milk Latte，熱嘅就係 Hot Coconut Flavored Latte。今日先試咗杯凍嘅先。OK吖，雖然唔十分特別，飲落口就係一杯落咗椰奶嘅凍咖啡，但麥咖啡嘅咖啡我係接受嘅，特別係當我將佢同嗰兩間紅紅綠綠嘅大連鎖比較，何只有得揮，計埋性價比，直情揮低嗰兩盞紅綠燈啦。新品推出做Promo試飲價$9.90 一杯，我無睇清楚去到鋪頭先知原來要用app落單先至係九個九，就咁即場買就要原價34蚊杯！結果，我為咗慳番24個1，出賣咗我個靈魂、出賣咗我嘅私隱、出賣咗部手機嘅記憶體，download咗麥記個app，填咗一堆去旅行入境都未必洗填咁多嘅資料，落單，慳咗24個1，自嗨咗幾分鐘，都算係做咗件自己想做嘅事🙂我極少去麥記，今日先知原來香港麥記有珍珠奶茶飲……選擇多都係好嘅，不過，就好似失去咗某一種Character 😐 去到麥記，我都仲係想見到麥當勞叔叔、滑嘟嘟同漢堡神偷，而唔係杯黑糖珍珠奶茶。