芽莊越式料理 (新城市廣場) (已結業)

今日去沙田新城市影紫藍波，琉光星河在7樓，影完就覓食，位於7樓的芽莊越式料理，剛好不用等位，立即入去開餐，加上很耐冇食越南野。河內魚餅，有四大件，真係抵食夾大件。每件都要4-5口才食完，魚餅好香口，內有爽口馬蹄粒，增加咬口，魚肉彈牙又唔腥，仲有香料味，好正。越式鮮蝦米卷，用幾層紙米卷著蝦肉、香葉、米粉、青瓜、生菜、甘筍等等，仲有芝麻。沾甜辣的酸汁同食，層次口感好豐富，清爽不膩又夠飽肚。蝦乾芥蘭苗，好多蝦乾仔，仲有花生及芝麻。芥蘭苗較嫩較脆口，配埋勁多蝦乾，咸香惹味，仲有花生香，令蔬菜不再單調。炆豬腩肉，忘了菜名，但份量好多，有幾件大大舊豬腩肉，仲有隻雞蛋。豬腩肉炆得好鬆化軟腍，脂肪入口即溶好夠油香，肉味濃郁又夠入味，連個汁都咁正，好想伴白飯食，雞蛋也很入味。燒牛肉撈檬，細細碗，但也夠飽肚，女仔食最岩。加入大量甜酸辣汁撈勻再食，檬粉爽口吸哂醬汁的味，酸酸甜甜食再多都無負擔，加上微辣刺激更開胃。燒牛肉都好多，唔乾不韌，香口肉味突出，不是嫩嫩的，而是帶咬口的肉感。