越味屋 (好旺洋樓) (已搬遷) 新店位置

行過見有新店開張就試下先，呢個舖位都轉過幾次唔同嘅外賣店，今次做越南野喎，都好吖，附近無乜越南野食。新店叫越味屋，主打越南食品，但都有港式飯餐同小食，口味多元化。叫左份外賣返屋企食，試下先。拎到返去外賣依然靚仔，個撈檬汁打斜左都無漏出黎，抵讚喎。叫左燒豬頸肉撈檬，賣相幾好睇，而且個盒好濶口方便是食。除有豬頸肉，配菜仲有青瓜絲，酸蘿蔔絲，生菜，花生碎同蔥等，有菜有肉夠均衡。酸汁比左大大兜，啱晒呀勁鍾意呢啲汁，呢度調教得酸酸甜甜啱啱好，好味好味。豬頸肉燒得香口，入口有嚼勁，正。檬粉爽口，撈左汁酸酸的勁開胃，份量仲幾大碗添喎。另外又叫左份越式法包雙併餡，可以揀切或唔切㗎。中間係咁樣，好足料喎。揀左雞肉拼手工扎肉，仲夾住其他蔬菜同芫荽，超香口呀，再多啲芫荽就正啦，個包烘過熱辣辣，入口鬆脆，大大個夠飽肚。飲品送紙包或罐裝汽水，可以加錢轉奶茶咖啡添㗎。整體黎講幾好味，價錢唔貴份量足，有下次。