喜鍋 海鮮.點心.活刺身 蒸氣石鍋專門店 (已結業)

近排香港興起蒸氣火鍋，上網見到依間好似唔錯甘，所以就一於就試下新野啦！依間舖入面既裝修都好靚，好別緻，環境好舒適，坐得好舒服。蕃薯蜆大大粒，粒蜆肉係同個殼差唔多size！！食落好鮮甜，好有咬口，得四粒真係好唔夠喉！！鮑魚係用蟲草花同薑絲調味，個鮑魚都幾大粒，好吸引。食落口啖啖肉，而目好彈牙，口內滿滿既鮮甜味，配以淡淡既蟲草花味，更能帶出鮑魚本身既鮮甜味，新鮮既食材配以簡單既調味已經可以好好味！和牛片切得薄薄地，好快就蒸熟。牛肉片食落十分嫩，而且帶有濃濃既牛肉味。食落口有濕潤既口感，唔會乾身。依種蒸法帶出左肉既鮮味，係一種唔錯既烹調方法。條魚剩係加左d薑葱去調味，但蒸既時間較得岩岩好，令到條魚岩岩熟，肉質嫩滑，新鮮既魚最後既煮法就係清蒸！☺將個南瓜排骨粥既材料首先放係鍋既最低，最特別既係依個粥係唔洗落水，用蒸既方法將佢煮熟。好特別既做法，最後侍應拎出一壼湯倒入d粥到再煮五分鐘到就完成。粥煲得好綿，而且有十分鮮甜既味道，應該係係之前上層既海鮮精華滲左落黎，依個粥真係做得好出色，好快就俾我地清曬！