GALBI TOWN

營業中

休息中

尖沙咀有唔少韓國餐廳，呢間最近新開張，由韓國人主理，主打韓牛燒肉，佔地8000呎，空間感十足，裝修簡潔，用平板電腦落單，晚上都幾多人食，但完全冇油煙味，適合聚餐。點完餐後會送上免費前菜，大部份都可以無限任添，款式多元化，而且味道都唔錯，淨係食嗰啲已經飽咗一半。平日午餐時段有套餐，夜晚主要都係燒肉為主，另外亦有鍋物等選擇。肉類方面要咗豬肋骨、五花肉同伊比利豬頸肉。店員會過嚟幫忙燒，服務周到，而且仲會擺盤，俾你影到靚一靚。個人最鍾意豬頸肉，入口即化，簡單調味已經食得，其他都夠腍身。小食要咗海鮮煎餅，薄身微脆，粉漿唔多，而且食落唔覺得油膩。另外有大醬湯，配料十足，飲落暖笠笠，調味啱啱好，撈埋碗白飯真係飽晒。最後飲埋支米酒，夠晒過癮。