Hal's Japanese Restaurant (已搬遷) 新店位置

早知中環、金鐘一帶揾食艱難，提前兩日好枱供3個人用膳，點知琴日一見到張枱，隨即驚訝！大多數夜晚先去幫襯 Hal's，未見識佢中午既3人座位，連放曬3份定食盆既空間都唔夠！唉，我地都係想坐得正常d啫，都係咁艱難！照例都係去反映問題，睇可唔可以提供另一個枱，兩位會講廣東話既一男、一女日本人職員同我講，三人枱就係咁樣！心諗即係無得選擇，跟住我宏觀一下四周 set 好既3人枱全部都係咁樣，心諗同佢拗都係於是無寶，唯有叫老公馬上走上紫玉蘭睇下有無位，好彩有啫，立即轉場，起碼坐得正常好多！唔係話佢有呢d規矩唔得，中午所有食肆都爭取黃金一小時做多d生意，客人都好明白。但唔係每個客人都知道呢個安排，係咪訂位時同客人講清楚會好d呢？讓客人自己選擇訂唔訂枱呢！呢次既經驗，真係估唔到呢個情況會係一間日本餐廳出現，真係無孤陋寡聞，新日本既服務精神乎？認真要改善、改善！下次再訂日本餐廳，我都會問得一清二楚，免除不必要既麻煩！