屋子 (已結業)

屋子一直都係我喺將軍澳餐廳bucket list之中嘅頭幾名。原因係餐廳食物質素高、環境舒適、價錢適中，亦係同朋友傾偈💬嘅好地方。呢度有多款唔同嘅日式set餐，有拉麵、冷烏龍麵、意粉、定食等等，選擇非常多，仲要有埋湯、前菜、甜品，連加一都係100蚊左右，性價比非常高。每次嚟屋子我都好鍾意食佢嘅冷烏龍麵，因為味道酸酸甜甜咁，真係好開胃，同夠晒透心涼，今次仲有埋海老天婦羅，完全係我杯茶。講起茶，呢度嘅飲品味道都相當唔錯，好有自己嘅特色，每次嚟我都會點西柚冰茶，因為入邊全部都係西柚，甜甜凍凍咁，飲落好舒服😌今次我同朋友仲叫咗2款小食同埋甜品，而烤起司章魚串同埋焙茶麻糬舒芙蕾相當有驚喜！個章魚串煙煙韌韌，撈埋啲芝士，好好味；至於個舒芙蕾亦整得非常有心思，空氣感十足，入面充滿濃濃嘅焙茶同埋煙韌嘅麻糬，連埋焙茶雪糕食，一凍一熱咁，簡直係多重口感嘅享受。