明閣 (鷹君中心)

最近試咗幾間酒店嘅點心，見到明閣早茶時段喺12:45前離座仲有75折優惠，所以下訂咗位嚟試吓。訂咗位之後先見到有啲食評話服務一般，有啲擔心，但最後嘅體驗都唔錯。用餐環境餐廳嘅氛圍符合期望，落地玻璃令到成個餐廳好光猛，座位之間嘅距離唔算太窄，用餐都幾舒服。服務質素服務員態度都幾友善，符合酒店標準，佢哋仲會來問對食物滿唔滿意，亦會幫手針茶，感覺幾貼心。食物ＸＯ醬炒腸粉 XO醬炒得好香，仲再點多次XO醬嚟食，真係好開胃。蝦餃、燒賣：真係新鮮好味，推介。如果兩個人嚟食，可以要求每籠只要兩件點心，啱啱好分。酥炸蜂巢芋角：呢個都推介，雖然睇落炸得幾熱氣，仲等咗一陣先上枱，但食落去好好味，炸得脆唔油膩，似係啱啱炸起咁。黑松露蘿蔔千絲酥：酥皮幾脆口，仲有濃濃嘅黑松露香味，食落去好滿足。雪山竹炭叉燒餐包：呢個叉燒包好好味，叉燒好新鮮又Juicy，食得出同一般出面嘅雪山叉燒包質感有啲唔同，值得一試。黑糖薑汁日本3.6牛乳奶凍：推介，奶凍好滑，奶味好香濃。總體嚟講，食物質素真係幾好，值回票價，未試過嘅可以嚟試吓，試完都會擺落推介清單，會再嚟。