麵尊

營業中

休息中

喺南區食到悶悶哋，今日午餐就去遠啲，出咗銅鑼灣覓食。始終都係旺區，選擇多好多，出咗香港仔隧道之後，又要方便搭車返去，去登龍街就fit曬。登龍街餐廳多選擇多，但同時間人都好多，同事咁啱想食車仔麵，於是就揀咗呢間麵尊，但去到排隊前面都起碼有十個人等緊，大概五六張檯左右，等位期間就填咗點餐紙先，都係一般車仔麵嘅餸，無話有啲咩特別嘅餸。大概等咗10-15分鐘先有位，坐低之後都要再等多5-10分鐘先有得食。碗麵一嚟到似模似樣，啲湯底色水同埋啲餸都好靚，但食落啲餸唔係太入味，已經叫咗豬皮豬腸呢啲好索湯嘅餸，咖哩魷魚都還可以，腩汁湯底味唔係差，但啲嘢都唔係太入味，係朋友份冬菇好少少。整體來講，食物質素唔差，如果索味啲就好。呢個價喺銅鑼灣嚟講都算平，但下次又要排咁耐先食到我就不了。