橫浜水產磯燒+遛Local Bar@Grill & Hot Pot (已結業)

咁啱行過旺角譽發有好多上樓餐廳，見到有日式火鍋，於是上去試吓。佢地有幾款餐可以選擇，我地就選擇咗美國牛肩肉放題 +刺身套餐，入面都坐得舒服，裝修仲幾有日本feel，店員首先叫我地選擇湯底，我地叫咗日式沙嗲湯，佢地同港式沙嗲湯唔同，冇咁油，都幾清，要黎煮肥牛一流。店員好快就拎咗刺身拼盤黎，分別有三文魚、帶子、北寄貝同甜蝦，d刺好新鮮，一d腥味都冇，三文魚好肥美，帶子同甜蝦都好鮮甜好大隻，北寄貝好爽口，正美國牛肩肉、黑豚肉同雞肉都好快上枱，牛肉唔太瘦唔太肥，好重牛肉味，煮耐咗都唔會太韌，黑豚肉同雞肉都幾瘦，d肉質好滑，呢幾款肉係無限任叫，佢地上菜速度都幾快。出面都有小食可以任攞，有小丸子、炸雞翼同壽司，小丸子同炸雞翼都係啱啱整起，熱辣辣，都幾好味，而壽司唔係一般嘅卷物，佢入面有幾款刺身，d刺身都好新鮮彈牙。出面雪櫃都有好多款火鍋配料可以任攞，仲有多款日式前菜，真係好多野食，性價比好高。呢度d飲品都好特別，有沙冰、乳酸飲品，我地叫咗朱古力沙冰同水蜜桃乳酸，朱古力沙冰好濃朱古力味，d沙冰好幼滑，而水蜜桃乳酸，酸酸甜甜好開胃。