康年餐廳 (已結業)

以前喺灣仔，經常會去柯布連道樂園茶餐廳買菠蘿包，鍾意佢夠新鮮好味，尤其係麵包底有烘底feel，食落少少脆，依家已經食唔到喇。近期湊熱鬧去旺角一間人氣茶記食菠蘿包，可惜唔係咁啱食。喺茶記附近行吓，見呢度有出爐菠蘿包就買個試吓，覺得唔錯噃。包包攞上手唔係輕飄飄，外型圓碌碌，冇超級發水，麵包香從紙袋飄散出嚟。菠蘿皮香脆，包包咬落有種舊式餐包嘅風味。試埋雞尾包同吞拿魚包，前者較甜，啱配咖啡奶茶；後者饀料唔多，較普通。三款之中，首選菠蘿包。