Oliver's Super Sandwiches

營業中

休息中

偶爾見到Oliver’s Super Sandwich推出左睇落好似幾抵嘅Dinner Special，$70就有一個酥皮湯、一個主菜同埋一杯嘢飲，所以就決定同朋友一齊去試吓。一共有三個選擇：意粉、焗薯同埋意大利包。我同朋友都揀咗挪威煙三文魚、蜆肉、刁草忌廉汁拼肉醬扁意粉。開頭以為佢嗰張相只係啲特別嘅設計，點知上枱就發現原來個意粉真係咁嘅樣，有兩種唔同嘅醬，真係好特別。個人比較鍾意三文魚蜆肉忌廉汁。煙三文魚嘅份量都幾多，鹹鹹地咁配埋啲忌廉汁真係好好食。肉醬就同普通嘅差唔多。佢個扁意粉本身都煮得啱啱好，唔會過軟或者過硬，而且份量都係啱啱好，食完唔會覺得餓，又唔會飽到上心口。我哋其實都係為咗個酥皮湯先決定去食，果然佢冇令我地失望。個酥皮焗得好靚，真係好好食。個湯係粟米忌廉湯，有好多粟米，同埋個酥皮一齊飲，真係好正。我嗌咗熱茶，後尾先知原來係檸檬茶，杯茶熱得來又夠晒濃，同濃味嘅意粉好夾。成餐飯唯一覺得美中不足嘅就係佢啲座位唔算好舒服。不過如果有機會嘅話我都想試吓其餘兩款晚餐。