三德素食館 (佐敦薈)

營業中

休息中

唔講大家可能唔知，依個商場前身就係發生火災慘劇嘅嘉利大廈，可能因此開間齋鋪會比較安心。不過話雖如此，經裝修後其實整幢樓都已經煥然一新，仲有邊個會計較舊時嘅事。家人近日介紹佐敦有間好好食嘅素菜館，一般人一聽到佐敦通常都會第一時間諗起普光齋，但估唔到依間嘅新派齋菜又真係唔錯。早前公司出花紅，所以興之所致請咗個好朋友嚟依度食。是夜客人唔算多，所以我哋獲安排坐窗口位，環顧四週竟然俾我發現有唔少外地人，由西人到海外華僑都有。我哋叫咗個套餐，有兩餸一湯，由於大家都怕熱氣，所以主力點菇同瓜而避免叫煎炸嘢。湯我揀咗個魚翅羮，但好唔得，口感比街邊碗仔翅仲要差。反而小菜就真係幾好，我驚唔夠飽再加咗個竽頭煲，連朋友都讚不絕口，如果下次同多啲人嚟就可以試多啲唔同嘢，難怪我啲親戚咁鍾意一家大細上嚟幫襯。臨走發現佢喺樓下有個地鋪賣齋，果然係豐儉由人一網打盡。