十三少 (已結業)

路過九龍城啟德，見到十三少酸菜魚，之前冇食過呢個品牌，大膽帶屋企人試吓。餐廳喺樓上，搭𨋢好快到，座位都坐得幾舒服。因為食完下午茶，所以今餐晚餐唔係叫咗好多，只係叫咗一個酸菜魚套餐，加小菜，甜品同飲品。酸菜魚：份量適合，叫咗小辣，惹味得嚟又唔算太刺激，不足嘅係唔夠熱，無辣嘴嘅感覺。四季豆：份量適合，預設辣度，我覺得味道剛剛好，但屋企人覺得少辣。皮蛋：份量，味道，賣相都很好，醬汁加分。話梅排骨：份量同味道都唔錯，用嚟撈飯都幾好食。糍粑：份量適合，外皮炸得幾香脆，點醬同點醬都好食，唔算太甜太膩，但食完好黐牙。五花茶：原本以為係自家製，但原來係支裝。贈送甜品：舖頭係食完嘅時候每位客人送咗一碗熱紅棗雪耳糖水，味道都幾好，但材料比較單調。總結：如果當普通食餐飯都唔錯，坐得幾舒服，但如果好鍾意食酸菜魚就唔好期望太大。下次再試吓佢嘅酸菜魚火鍋，熱啲可能會比較啱心水。