潮丸 (已結業)

位於金馬倫道嘅呢間小店，裡面嘅裝修簡約整齊，比起傳統粉面店坐得更舒服，感覺更高級。幸好還未到晚飯時間，唔會坐得太過擠拥。餐廳叫潮丸，主打係丸類，但睇返餐牌，仲有好多招牌菜，例如牛三鮮，魚三鮮，滷水拼盤，好多唔同款嘅小食。每一枱都有3款辣椒醬，有紅椒，黃椒同傳統辣椒油，試晒3隻後，我比較喜歡黃椒辣中帶甜。牛三鮮有牛腩，牛肚，牛根，但就無牛丸，所以唯有自己加$15特級牛丸王。特級牛丸王質感結實，好彈牙爽口，果然係特級！牛腩炆得好冧好入味，牛肚厚身，咬落去啖啖肉，唔會好靱，牛根又冧又有膠質，果然好鮮。魚三鮮有魚旦，魚片頭，同魚皮餃。魚旦好彈，好鮮甜，魚片頭同魚皮餃亦一樣好味，比平時任食火鍋嘅更新鮮，更甜。滷水拼盤有好多款，有滷蛋，五花肉，豬手，豬大腸，豆腐。豬手大大件，好入味，豬手皮好彈牙，裡面嘅肉炆得好冧。呢個拼盤份量超多，非常抵食。