隨變火鍋

營業中

休息中

約左朋友食飯，兩條佬去打邊爐吹下水的確唔錯。搵左間有串燒有火鍋既，去到先發現可以食埋雞煲。坐底既時候比佢包紙巾吸引左，好少見咁好會提供Tempo。燒手工雞皮，又脆又軟，咬緊既時候仲會有啲油出返黎，並唔係乾哂。孜然牛肉串，好香孜然味，肉都好腍又有肉汁。回味香辣雞煲，我地只係叫左微辣，廢事太辣飲好多野。雞都滑，食胸都唔會太嚡。湯都好濃好夠味。奇脆炸魚皮，就咁食都脆，浸一陣湯索埋啲湯更加好味。鮮爽黑柏業，好大塊，煮完無乜縮水而且好爽口。頂級手切牛頸脊，雪花紋路好靚，食落好腍好香肉味，手切當然係唔同啲。不可錯過手工雲吞王，多蝦好足料，成粒都好飽滿，皮仲要夠薄。棍打牛筋丸，好彈牙，多汁同有牛味。