蜜庵本膳 (已結業)

早兩日食過一間日式風格嘅餐廳，都幾出名㗎，不過我自己食完之後就覺得好似直升機咁，伏伏伏伏伏。。。。依間舖頭其實之前一直都好想去試吓，佢主打日本家常菜同埋日式米粉pancake，喺網路上都有一定嘅人氣，我開頭以為晚市都有定食，發現冇之後我同我朋友就叫咗和牛漢堡丼同埋香橙朱古力pancake。首先一嚟就係黃牛漢堡丼，大家睇到佢嘅蛋黃同漢堡同埋個飯差唔多大，就應該知道個份量真係好少，我冇記錯佢賣緊160幾蚊1份，CP值有啲低。首先佢嘅炸蓮藕片好薄但係有少少淋，粉紅色嘅米飯口感都算煙韌，不過冇乜味道。漢堡扒嘅燒汁比較鹹，而且漢堡扒太熟冇乜肉味，好彩有蛋黃嘅加持先至勉強覺得塊漢堡扒入得口，搞到我同同場嘅朋友都覺得好失望。至於個香橙朱古力pancake，唔知點解佢嘅香橙肉有啲苦，有一種說不出嘅奇怪。而且pancake口感有啲奇怪，唔知係咪我好少食到用米粉做嘅pancake，我覺得口感唔係好鬆軟，有少少好似未煮好粉粉地嘅感覺。呢間店好老實講我就唔係好推介啦，雖然我自己都鍾意食日式家常菜，不過呢間舖頭好似同我既期待有偏差，唔知道食過呢間舖頭嘅朋友仔有咩感覺呢？大家可以下面留言話俾我聽架！