莆田 (港威商場)

營業中

休息中

全球第100分店開張，全線正價食物8折優惠，做到8月13號。福建新加坡菜係香港坐得舒服又色香味俱全既真係唔多，莆田真係算數一數二。之前食過美麗華個間，搬咗之後第一次食。今日兩個人叫咗6樣嘢。前菜揀咗冰鎮鮑魚。整得好入味而且好腍，加上個汁有少少沙冰咁，好特別。海蟶有9種煮法 相信大家都唔陌生，成日有廣告。我哋今次揀咗蒜蓉蒸同埋鹽焗海蟶。蒜蓉蒸再加埋個唔鹹嘅豉油汁，好正。鹽焗就食到本身嘅鮮甜味。如果先上鹽焗後上蒜蓉蒸嘅次序會更加好。海蠣煎唔會係炸得好勁個隻，我中意煎嘅感覺，加埋佢嘅辣汁好夾好好食。芋香鴨嘅鴨肉好嫩，唔肥，加埋新鮮炸，外脆內軟。甜品試左金錢粿，甜甜地又煙韌，幾特別，不過可以甜多少少，呢日食有幾嚿唔夠甜。整體都好好食。環境唔錯，新裝修，係2人枱比較細。服務都好好。