港灣壹號

營業中

休息中

呢次喺grand Hyatt 「港灣壹號」食中菜慶祝爸媽嘅生日，嗰晚因為太遲訂枱，所以只坐到8樓，冇辦法欣賞到落地玻璃嘅維港夜景，有啲可惜。不過食物方面，開胃菜有「琥珀合桃」同「梅酒香小紅茄」，正！合桃甜中帶酥，好快俾我個女K.O.晒，小紅茄酸甜開胃，仲有好香嘅酒味，啱晒我爸食。主菜方面，「蜜糖汁叉燒」真係有驚喜，色香味俱全，啖啖肉又好彈牙，大人細路都爭住食。「脆皮龍崗雞」都算唔錯，皮脆肉嫩；「鎮江醋香黑豚豬柳」就正常；「砂煱干煸蟹肉炒粉絲」就ok，不過「煙燻馬友」就好出色，煙燻味好香，食落去好滋味。甜品方面，本身想試蛋撻，不過要等20分鐘，所以算了，最後試咗「黑白芝麻千層糕」同「鳳梨奶皇千層酥」，十分滿意，尤其係鳳梨奶皇千層酥，香脆得嚟又唔膩，好快就清碟，下次一定encore。服務質素同環境都好讚，尤其係餐具設計得好精緻，連小朋友用嘅餐具都好靚，見到餐廳好用心。整體嚟講，雖然今次冇搶到靚夜景，但食物同服務已經足夠令人開心，慶祝嘅心情一點都冇減。推薦俾想食粵菜嘅朋友！