餃掂快線

荔枝角收工見到呢間嘅餃子店，好驚喜發現有全素嘅餃子，真係好難得。今次就試咗至尊松茸湯餃(8隻)，煎松茸素餃(7隻)，一份四川涼麵，飲品就加咗自家製山楂雪梨水同埋蜂蜜檸檬薏米水。無論素餃定係肉餃都好有份量，好足料，咬開都睇到內餡係有菇。至尊松茸湯餃個湯飲落係好健康，都幾肯定冇落味精，另外附上一盒松茸醬，加埋啲餃一齊食松茸味濃。煎餃亦都好香口，我鍾意食辣，所以就加咗啲菜脯辣醬，簡直係更惹味。四川涼麵有辣醬，同埋另外有一盒麻醬，撈埋一齊好食。佢嘅飲品都有驚喜，唔係死甜，飲得出係清甜。整體嚟講覺得呢間餃子都幾好食，可以再encore，佢準備都好快。