龍城冰室

營業中

休息中

今日嚟尖沙咀做facial，因為夜晚要上堂所以唯有五點零左右搵少少野食醫下個肚先，經過依間冰室見到入邊有好多選擇，又有下午茶揀，決定入去試吓！喺冰室嚟講入邊都坐得幾闊落幾舒服，而且有卡位坐~scan qr code就可以落單，個系統勁多野食揀，搞到唔知食咩好，最後我揀咗招牌古早鹽焗雞飯，花生醬西多同埋檸檬可樂☺️首先講佢哋嘅招牌古早鹽焗雞飯！一上枱已經聞到雞香，雞肉嘅份量好多，而且雞肉亦都唔會話過分烹煮，令到肉質難咬，鹽味滲透入肉，基本上都唔需要再點薑蓉！跟餐送嘅例湯係佢哋嘅老火湯，雖然唔知係咩湯，但係入邊嘅材料亦都煲到超腍，雞腳基本上亦都皮肉分離，感覺係煲咗好耐嘅老火湯講完主食，一定要推介佢哋嘅特厚花生醬西多！真係厚到我擔心自己食唔晒，新鮮出嚟嘅西多士真係唔一樣，加上邪惡嘅牛油同埋糖漿，我切開已經見到中間嘅花生醬流緊出嚟，真係邪惡！另外比較貼心嘅位置係佢哋嘅糖漿係分開俾你嘅，所以你可以按照自己嘅需要去睇吓落幾多。最後講返杯無糖凍檸樂，唔係間間餐廳都可以揀無糖可樂，所以覺得都幾貼心，加上食完西多士再配返無糖可樂真係透心涼！價錢方面都幾親民，喺尖沙咀食咁多嘢買單都係百零蚊～