牛記茶室 (已搬遷) 新店位置

是日週末，四人約定去試試“牛記”的馳名牛腩煲，舖面頗逼狹，坐得唔係咁舒服，本著為食，都無所謂。叫了蘿蔔牛腩煲，網友四月份的食評寫70元，現已是 80元了，是崩沙腩，味道唔錯，以價錢論，“腩”的份量太少了！西蘭花炒牛肉，都炒得幾嫩滑及青綠。豉汁炒蜆，60元例，份量唔多，但絕對無砂無死蜆 (老闆話逐粒檢查過喎)，不過無鑊氣，唔夠香，似豉汁撈蜆多一些！炸豬大腸，我多數在“泉章居”吃，見此處有此菜式，都試試，似翻炸貨，色澤暗、又乾又無味，風都吹得起！由於各菜式份量都是偏少，所以最後加碼叫了“大馬站煲”。嘩，上菜時，蝦醬味香，內含的燒腩半肥瘦、炸豆腐嫩滑、蒜芯脆口，最驚喜的是那蝦醬味道會在口腔回甘，可以話越食越鮮香，這味“大馬站煲”相信是吸引我會再光顧的原因！總括來說，廚藝無特別，但用料偏向中上貨式。食完要急急走，坐多陣都唔舒服。