華星冰室 (E-Max) (已結業)

星期日去九龍灣展貿睇戲，睇之前去華星食個常餐，其實展貿都開咗唔少餐廳，中日西都有選擇，不過驚伏伏地，所以都係去間有啲名氣嘅餐廳食。唔知係咪有function，舖頭十分多人，好彩都搵到窗邊位。多士夠厚，亦有淡淡嘅牛油香；炒蛋有點兒過熟，唔夠滑；火腿兩片正常；叉燒意粉好明顯係意粉多過叉燒，啲叉燒好細塊，同埋有啲肉酥味，入到口但唔算好食，意粉就整得幾好，夠彈牙唔會冧哂；至於蜜桃小丸子最愛飲嘅杏霜就令我好失望，好淡，淡到好似飲水咁，希望下次可以沖得濃啲。