德興火鍋．海景軒 (已結業)

補寫食評,因為見到好多網友都彈,我都食得唔係咁愉快想講講!之前恆生卡做半價, 等得耐係正常,本來想訂位, 但係話無得訂, 去到拎飛等位,出面位姐姐就唔太耐煩, 不過可以理解,因為好多人問呢樣問o個樣又問等幾耐等等........入到去要坐門口, 算啦, 太多人喇!點菜位阿叔同擺枱位阿姐都幾好人,阿叔仲話恆生請食飯, 半價真係好抵o架,梗係食好d 啦!我地都叫o左好多貴o野, 六個人食到肚爆!而o野食其實真係唔錯,新鮮同份量唔會好少!之不過有位阿哥好似好有禮貌, 但佢d "唔好意思", "等等" 之類o既說話講得非常之求其同唔願意,加上催o左幾樣o野好耐都唔o黎,好似食緊自助火鍋咁!隔o左幾個星期都仲記得個龍蝦剌身由一入坐落單到食完哂加單o既時候再催再食完再等, 之後至話賣哂!唔知係咪貴o野唔俾您半價食太多!但之前話阿叔又話係恆生請, 唔關佢酒樓事,即係佢係唔係都應該賺咁多啦, 咁點解唔一早講話無呢?半價o黎講又新鮮肥牛又象拔蚌剌身等等貴o野真係抵到爆,但後生o既侍應d 服務態度再加上原價一d都唔抵食,相信唔只megabox,其他德興都未必再會去!