嘉韻酒樓 (已結業)

海韻酒家前身，連職員都冇乜點變，沿用返扺食套餐吸引食客，試左個四人商務晚餐$488，四盅雞湯翅，兩片翅片完整，湯得個鹹字，半隻鵝，熱辣辣，皮脆肉嫩，脂肪少，算得上招牌菜，菠蘿炒駝鳥肉，唔知係咪冇駝鳥肉？求其俾Ｄ雞肉炒就以為可以過骨？駝鳥紅肉黎個喎？雞肉扮駝鳥肉？你當人傻架？清蒸多寶魚，多寶魚本身肉質嫩滑，加上清蒸又冇乜技巧可言，味道不過不失，杏仁片炸百花球，當佢蝦丸咁食都唔錯，甜品椰皇燉雪鴿膏，燉品咁熱，好自然用湯匙“畢“上面飲先，發覺好似滾水咁，一Ｄ味道都冇，原來實情係後加糖漿未溶，食到尾先知甜到嘔，簡直係垃圾不如既甜品！招呼都係一般，有人做野，亦有幾條友“扮“時運高，睇你唔到，等第二個做囉，呢頭食完，睇都唔睇檯面張單印住甜品跟椰皇燉雪鴿膏就上紅豆沙甜品，我要求佢更正，佢就話“是但啦，送埋俾你勒！“，老友，食得落先得架？你估送既就貪你小便宜咩？咪話你懶癈事欏走，仲夾硬要擺低，咁既服務態度真係吹到啤啤聲！連茶介加一，兩個飯同十蚊三支既啤酒，埋單咁就六舊幾，食物質素參差，Ｄ人就非常騎呢。全店禁煙，食滿二舊半送一粒鐘泊車卷，五舊水以上晒冷都係送兩粒鐘。