恆安冰室 (已結業)

去得屋村茶餐廳，對食物唔會有咩期望，但係絕對冇諗過我來比錢你賺，仲要受你氣。話說尋晚9:00附近茶餐廳都收晒，我見佢仲開門，再諗住入去食過頹飯，叫咗個粟米龍脷柳小菜套餐，食物賣相就自己睇囉，去醃到啲魚非常之鹹就知道啲食物有幾新鮮，算啦，喺屋村幾十蚊食垃圾都預咗㗎啦！佢嘅服務唔好咁差先得㗎，我食到一半見佢仲有個例湯未嚟，就問吓佢：「即係，係咪仲有個湯？」，點知佢話：「唔好呀！買晒㗎啦！」，然後再話：「你又唔早啲出聲？」，但係明明係我問之前佢就問啲熟客：「要唔要例湯？送俾你飲。」我火都嚟就好唔客氣咁樣鬧返佢，咁我都仲係坐喺度鬧，都仲未起身，佢哋即刻係咁講對唔住，驚死我有進一步行動咁樣，跟住仲話：「仲有例湯，仲有例湯」，「唔好勞氣，唔好勞氣」，總之就係欺善怕惡到一個點。總之我就算香港真係饑荒嘅話都唔會再幫襯佢㗎喇，如果各位網友冇辦法真係要幫襯佢嘅話，就可以對佢哋惡啲，唔使咁客氣，有咩就鬧爆佢哋得㗎啦，咁樣服務可能會好返少少。