天外天

今晚同友人食生日飯，一年一次當然要食好啲，揀咗呢間係Hotel Icon嘅中菜餐廳。預先有book枱坐到窗邊嘅位置，可以望住個維港夜景食飯，好賞心悅目，剩係望個景都值回票值，哈哈～叫咗片皮鴨晚市套餐。前菜有：青瓜紅蜇頭。蜇頭好爽青瓜好脆。原隻鮑魚雞粒撻。味道估唔到咁夾，食落好有口感。五香安格斯脆腩片，好惹味，能夠做到外面脆入面肉又軟硬剛好，厲害！港式片皮鴨，店員會先拎未切嘅鴨比我地望，就咁睇都覺得好吸引。片出嚟都幾大塊，薄餅份量剛好可以一塊夾一片鴨/鴨皮，夾埋青瓜京䓤食好滋味呀！食到鴨嘅油香加上爽脆嘅青瓜感覺唔肥膩，唔錯！生拆蟹肉菜苗羹，清清地幾鮮甜，飲落好多蟹肉。乾燒明蝦球，一人兩粒大大粒好彈牙，就咁食會覺得好甜，但連埋個香噴噴嘅櫻花蝦帶子蟹肉炒飯一齊食就啱啱好。芒果熱情果泡芙配白朱古力忌廉，最上面果粒外面Q彈入面係芒果熱情果汁好得意。兩人埋單約1400蚊，有靚景又有美食真係個難忘嘅生日呀！