火夫

營業中

休息中

火夫有個＄138套餐，有齊三色前菜（雞肝多士、枝豆春卷、麥粒味噌青瓜）、主食（我同朋友分別叫咗明太子撈麵同招牌虎蝦濃湯麵）、兩串串燒，我同朋友叫咗幾款嚟試下，分別係白燒活鱔、雞心喉、雞腎同蟹肉牡蠣。最後仲有杯餐飲，普通凍麥茶，但有日本餐廳級冰凍。 首先菜餚份量唔細，食完前菜都有啲啲飽肚感（可能我細食）法包多士香脆熱辣辣，雞肝綿滑、少少雞內臟嗰種味道，但無想像中咁濃味，都幾夾個包。枝豆春卷幾新穎，脆薄皮下包住好多粒枝豆，調味偏淡，中和雞肝重味。青瓜正常發揮，新鮮脆口已合格有突。 幾乎每枱都嗌嘅虎蝦濃湯麵，湯頭濃郁，睇隻橙色同個漿糊質地都知幾足料，隻蝦外皮都係蝦，係好多隻櫻花蝦嘅爆炸外殼，略嫌有啲咸，入面隻蝦果然好巨型，彈牙爽口，麵條亦煮得剛好，有口感之餘唔會太淋，唔止掛汁，直情係百分百填滿每一條麵，食到最後有啲漏。明太子不過不失，份量絕對大方，但都係有啲漏。 串燒食得出唔係cheap嘢，火喉恰到好處，特別係雞串燒，有少少日本居酒屋風味。蟹似牡蠣爆汁辣口，白膳保留到個水份，有鮮味，唔會好乾柴。講真，比起個麵仲略勝一籌。