隨心 (已搬遷) 新店位置

星期五放工之後同老公去屋企附近既隨心食晚飯。食物唔錯之外，服務態度亦唔錯。海鮮喇沙粉底係米粉同瀨粉兩溝，可以同時間食到唔同既口感，喇沙湯底幾好味，有椰香，又唔會好辣，配料都好足，有蝦、帆立貝、魚片、蟹柳、蛋、豆卜、芽菜，好豐富。檳城海鮮炒飯上碟熱辣辣，連隻碟都係熱架。炒飯夠乾身，唔會痴埋一舊，海鮮切到細細舊，令到你每啖都食到唔同既配料。飲品叫左熱桂花紅茶同凍雪梨茶(少冰)。桂花紅茶茶味好濃，雪梨茶夠清甜。