桻之燒 (已結業)

Item: 桻之燒
Rating: 5
Author: manfungpun

191 食評

味道

環境

服務

衛生

抵食

5703

筲箕灣

$201-400

日本菜海鮮串燒居酒屋

166

manfungpun

等級1

因為懶，所以一向唔喜歡寫食評，但係呢間小店已經食左9年，依然係清酒同食物上不斷俾到驚喜我，決定認真寫一寫，分享一下唔係打手嘅comment。是晚餐單有少少特別，因為係特意安排嘅sake pairing dinner，所以菜單係平時桻之燒無售賣嘅，係專門為配酒而設計嘅新菜式。今次係第二次參加佢地嘅sake pairing，食得出兩位大廚經過上次經驗，有好認真咁聽我地嘅意見，又再在食物上大大改進。酒釀蕃茄+鰹魚魔芋浸漬+瑩光魷魚醬油漬蕃茄用月桂冠上撰再加新鮮青橘酒，要浸兩日以上才入味，上邊放有紫蘇葉。作為第一道放入口嘅菜餚，好温柔咁同我條利打招呼😆第二道係我甚為喜歡的魔芋，入面有枝豆同昆布，今次份量終於少左，會無咁飽，非常細心嘅安排。瑩光魷魚食得出無至前或街外嘅咁咸，詢問老闆後原來的確係減咸版，好彩我都食得出😅證明我都唔係亂咁食。係我好喜歡嘅瑩光魷魚版本。活蟶子/柚子一口蠔蟶子係晚飯前幾小時前先新鮮到貨，煮到剛剛熟後再過冰，完美地保留左蟶子嘅鮮味及彈滑口感，蟶子裙邊下放了醋青瓜條，令蟶子輕輕帶微酸，非常清爽。另外嘅蟶子肉更厲害，開頭以為係普通柚子牆，原來係用泰式酸橋頭入饌，自家研發嘅醬汁，

酒釀蕃茄+鰹魚魔芋浸漬+瑩光魷魚醬油漬

蕃茄用月桂冠上撰再加新鮮青橘酒，要浸兩日以上才入味，上邊放有紫蘇葉。作為第一道放入口嘅菜餚，好温柔咁同我條利打招呼😆第二道係我甚為喜歡的魔芋，入面有枝豆同昆布，今次份量終於少左，會無咁飽，非常細心嘅安排。瑩光魷魚食得出無至前或街外嘅咁咸，詢問老闆後原來的確係減咸版，好彩我都食得出😅證明我都唔係亂咁食。係我好喜歡嘅瑩光魷魚版本。

活蟶子/柚子一口蠔

蟶子係晚飯前幾小時前先新鮮到貨，煮到剛剛熟後再過冰，完美地保留左蟶子嘅鮮味及彈滑口感，蟶子裙邊下放了醋青瓜條，令蟶子輕輕帶微酸，非常清爽。另外嘅蟶子肉更厲害，開頭以為係普通柚子牆，原來係用泰式酸橋頭入饌，自家研發嘅醬汁，出奇地夾，亦無橋頭嗆喉嘅感覺。整個酸味好有層次。一口生蠔一向係我至愛，平時係桻之燒一般係配以初代大廚阿賢自制salsa醬，而是晚係配以柚子醬，柚子清新得黎又唔會蓋過蠔嘅鮮味 perfecto🤤呢道菜配以九平次彼之地品飲亦非常適合。九平次嘅釀酒師曾經遠赴法國學習白酒釀制技術，回國後加入去清酒釀製，出黎嘅sake入口有豐富礦物氣感，中段會有白酒嘅果香，非常清爽。一直係我甚喜歡的一鉻柄。

清酒醉鮮魚/活北寄貝

清酒醉鮑魚，採用本地新鮮鮑魚，利用獺祭三割九分浸製，奢華嘅組合。本來係食貴妃蚌，但老闆話無新鮮貴妃蚌，所以改用北寄貝。將獺祭三割九分淋上北寄貝黎食。酒香加上貝汁嘅鮮味，係無語侖比。老闆話早排睇過一本書，訪問獺祭嘅釀造師到底咩食物同獺祭最夾，而答案就係貴妃蚌。的確上次配搭貴妃蚌係會比較鮮甜，但北寄貝豐的口感亦唔失禮。

九洲有機原木育椎茸鰹魚湯

其實食到呢道已經有d tipsy，呢個時候飲返碗湯令我又滿血復活。昆布鏗魚高湯再加上大量椎茸，一打開蓋旁邊朋友已經轉過頭黎碌大隻眼同我講：好香喎🤣佢個表情令我非常深印象

蟹膏珍寶帶子燒

用松葉蟹膏煮成嘅醬汁非常濃郁，帶子煎至7分熟，外脆內嫰。最欣賞嘅係大廚好細心放左兩粒枝豆，將枝豆放上帶子一齊食，整個口感會好完滿。雖然老闆話今晚係食日本鄉土菜，但望住奢華嘅食材，再加上呢個法式擺盤，根本係6星酒店級數，點鄉土呀🤣

南蠻鯛魚柳配飛露喜特別純米酒

其實夾硬要係雞蛋入面挑骨頭的話，呢道菜相比其他唔算搶眼。不過正所謂小隱隱於野，大隱隱於市。呢道菜嘅精髓正正隱於酒中。飛露喜係一枝連續19年榮獲特別純米酒類別冠軍嘅清酒，特色係比較重旨味同擁有濃郁清酒氣息。先食一啖酸酸甜甜嘅魚柳，再飲一口飛露喜，兩者起到互圓互補嘅化學作用，個種味覺嘅和諧，完全係sake pairing 嘅重中之重，我認為呢道菜係是晚最成功嘅配對。

關東赤麵豉牛舌煮

係桻之燒另一靈魂人物阿歡大廚嘅自創得意菜式。牛舌總共經過三次烹調，需要極多功夫及時間。赤麵豉醇厚嘅咸辣味完全滲入牛舌之中，牛舌經長時間烹煮，入口即化，上枱前再輕輕燒焦牛舌表面增加焦香味。感覺好似食緊綿花糖咁。牛油加麵豉嘅香味會好長時間停留係口腔。旁邊朋友知我係第二次食呢道菜，所以不停偷我個份食😅無他嘅，美食總需要與人分享。呢道菜配以重旨味嘅菊姬清酒亦係十分合適。菊姬作為我最近嘅至愛，味道自然係無懈可擊，酒樽上再題上王維嘅詩《送元二使安西》令成件事多左一番詩情畫意。令到呢道菜昇華成一件藝術品。

36小時低温熟成白鱔+傳統粥品

菜名已經說明左呢度菜係幾咁需要時間煮😆可惜呢件36小時嘅白鱔只係停留左係我枱上3.6秒就被消滅左。最後食返一碗白粥清清味蕾，完美。單睇相已經見到碗粥係幾咁棉滑。

是晚甜品，對於一向唔喜歡栗米又唔喜歡甜食嘅我黎講。諗住呢道應該都無咩好講。對唔住，係我又膚淺左。日本白栗米，非常清甜亦很有水份，其實係水果一樣。栗米布甸非常綿密幼滑，沾上caramel 係好好食。最令我欣賞嘅係個幾粒炮谷，成個甜品都係用栗米，但就巧妙地灌穿左3種口感。爽脆多汁嘅白玉米，棉滑嘅布甸，有咬口嘅炮谷。dessert wine係少見嘅貴釀酒，貴釀酒都係清酒一種，但由於生產耗時成本又高，所只佔每年日本清酒產量不足1%。主要釀酒過程中把水呢種原料換成清酒，亦即等於清酒的二次釀造，所以甜度非常高。無諗過清酒都可以做dessert wine，簡直大開眼界。

利申本人係桻之燒長期顧客，欣賞佢地呢10年黎一直用心做食物，而且不斷勇於嘗試及創新，一路都帶俾我無數驚喜，很感恩在漫長嘅清酒世界探索旅程嘅中有桻之燒一路作伴。咁多年黎，佢地係食物上不斷傳承不斷改進，呢種精神好值得敬佩。老闆經常講桻之燒嘅宗旨，就係為酒配人，為人配酒。浪漫。有機會係桻之燒遇上，不妨我地都飲一杯。