麻辣娘子 (新都城中心) (已結業)

呢日早收工，見新都城附近有個小丸子展覽，順便去打卡，估唔到最近都開咗咁多新鋪，見呢間川菜館有唔少人排隊，目測似乎唔錯，一於同友人試下。先嗌左兩份小食，川汁皮蛋好特別同一般皮蛋唔同，平時嘅皮蛋都係灰灰黑黑，呢度嘅皮蛋係金黃色，賣相非常吸引，加上香辣嘅醬汁撈埋，辣得好開胃。朋友就話想試夫妻肺片，原來係麻辣涼拌牛舌同埋牛肚片，爽口彈牙，都唔錯。見到有唔少客人都有嗌呢一味娘子酸菜魚，不過我哋得兩個人所以就叫咗小份， 但份量一啲都唔小，起碼可以足夠三四人食用。魚肉大大片而且好滑溜，加上冇乜骨，而且酸菜味都好香，底下仲有啲豆卜芽菜同薯粉，吸收晒湯底嘅精華，好好味。而且呢度仲有唔少台式飲品可以選擇，我就叫咗草莓水果茉香綠茶，朋友就飲芒果水果炭燒烏龍茶，味道都唔錯，水果好新鮮，而且唔會太甜，好有茶香。兩個人人均二百零蚊， 食物份量好大份，味道同埋賣相都唔錯，可以下次再約多啲朋友一齊食。