影片
更多
2014-10-12
2306 瀏覽
成日聽身邊朋友講好煩，有啲故之然喺人事或制度嘅問題，但有啲源於唔知足，對現況好多嘢都不滿，當然，人人都有自己嘅追求，不過，晌心態上做到知足就常樂嘛。典故都有講：樂天知命，故不憂。雖然我唔多信宿命論，但自覺都算喺個樂天派嘅人，食幾多，著幾多，都唔使下下強求，就好似今晚嚟到樂天皇朝，好味，唔好味，細意品嚐，學習欣賞，心情可以輕省好多。由開業至今都成5個月，估唔到都仲喺咁多人，雖然鋪面外仍有數張4人枱空著，不過，眼見好多客人寧願等入面都唔坐出面嘅「商場」位，大抵感覺好似被「樓上」嘅人望實晒。入到鋪內，感覺又確喺值得等吓嘅，大堂正中間一個長型水池，池上以青銅蓮花燈做裝飾，池尾掛著一件透明龍袍，堂皇型格；左右幾邊都喺卡位，前後都有通花屏風，感覺通爽而不失保留多點私隱，而其他幾邊仲有啲4、6人枱。入門口左邊就喺廚房嘅一部份，透過玻璃就見到多位師傅密密搓、密密包，正正製作緊店家嘅招牌之一「樂天皇朝八種口味小籠包」。雖然嚟之前都已經有幾樣心水，但都要翻一篇餐牌，睇睇仲有咩好嘢食。除小籠包外，類別仲有點心、湯、涼菜、經典小炒、飯麵、拉麵、甜品、飲料，以及另一個獨立新推「新加坡風味」，全部圖文並茂，中英文
由開業至今都成5個月，估唔到都仲喺咁多人，雖然鋪面外仍有數張4人枱空著，不過，眼見好多客人寧願等入面都唔坐出面嘅「商場」位，大抵感覺好似被「樓上」嘅人望實晒。入到鋪內，感覺又確喺值得等吓嘅，大堂正中間一個長型水池，池上以青銅蓮花燈做裝飾，池尾掛著一件透明龍袍，堂皇型格；左右幾邊都喺卡位，前後都有通花屏風，感覺通爽而不失保留多點私隱，而其他幾邊仲有啲4、6人枱。
入門口左邊就喺廚房嘅一部份，透過玻璃就見到多位師傅密密搓、密密包，正正製作緊店家嘅招牌之一「樂天皇朝八種口味小籠包」。
雖然嚟之前都已經有幾樣心水，但都要翻一篇餐牌，睇睇仲有咩好嘢食。除小籠包外，類別仲有點心、湯、涼菜、經典小炒、飯麵、拉麵、甜品、飲料，以及另一個獨立新推「新加坡風味」，全部圖文並茂，中英文對照，唔會錯估其他菜式，又有晒編號，唔會嗌錯嘢落錯單。
其實，樂天唔止環境花咗功夫，就連餐具都一絲不苟，泥啡色嘅匙羹及餐碟，都印有店家名號及龍嘅暗花。
皇朝小籠包（八種口味） $88雖然8種味道嘅小籠包都可以個別散叫（分6粒份及10粒份，價錢視乎味道有別），但第一次嚟又或多心嘅人，點一籠有齊8款嘅「八種口味小籠包」應該喺最正路，不過，一次嚟3籠會唔會有點誇呢！晌個餐牌裡，連個食法都介紹埋，認真細心。有朋友覺得有點貴，但試過又覺得值喎。
8種味道包括原味、人參、鵝肝、黑松露、芝士、蟹粉、蒜香及麻辣，每一個由唔同顏色去區分，未食已覺得好養眼，而餐牌都說明所有顏色都採用全天然色素去做，應該可安心食用。如果唔喺個店員再提一提，真喺忘記食依8款小籠包喺有個次序, 由淡至濃，不過，個人嚟講，就覺得唔使太需要跟佢建議個次序，食完一個飲啖茶就可以嘞，況且，又唔喺一次試晒咁多款味道，但食「有味」嘅小籠包就真喺強烈建議唔好蘸醋，免影響咗個別味道。
原味 - 米白嘅原味，外皮相當薄，但仍有一定韌性，夾起都唔會輕易穿。一咬爆汁，小心慢食，而肉餡鬆化唔死實，鮮甜美味。
鵝肝味 - 啡黃嘅鵝肝味，一入口有啲驚喜，真喺嗒到甘腴嘅鵝肝，連帶湯汁都有少少甘甜。
黑松露味 - 烏黑發亮嘅黑松露味，散發幽幽香氣，估唔到黑松露味好突出，無諗過跟小籠包都夾到。
芝士味 - 橙黃色嘅芝士味，唔單湯汁多，晌豬肉內真喺拉得出一絲絲芝士，口感非常過癮。
蟹粉味 - 橙啡色嘅蟹粉味，都擔心會唔會將貨就價，不過，食過就覺得諗多咗，因為蟹味濃郁。
蒜香味 – 泥灰色嘅蒜香味，蒜香突出已在預期之內，但咬落有粒粒炸蒜嘅脆口感，倒是意料之外。
麻醬油麥菜 $48依碟喺食友推介必試，其實油麥菜都食唔少，尤其豆豉鯪魚炒油麥菜，不過，作為涼菜食都喺第一次，好有新鮮感。翠綠嘅油麥菜捲起並以薄薄青瓜綑成一扎一扎，疊成山丘狀，賣相已感覺好清新，食落原來非常爽脆，咬落喺「索索聲」；沾一點自家製麻醬，使清新變成香濃，嚐出另一種感覺，果然喺必試推介。
香辣蒜泥白肉 $58蒜泥白肉晌唔同嘅店子食過唔少遍，一向佢個形象都喺薄切一片疊一片，但樂天嘅蒜泥白肉做得好別緻小巧，腩肉依然切得非常薄，又唔會好多肥膏；捲起好多青瓜條，再淋上香辣蒜泥，辛香惹味之餘，口感清爽好多，好有心思嘅做法。
香濃咖啡骨 $684款新添嘅新加坡風味菜式中，可能對咖啡有點偏好，所以，對個香濃咖啡骨好有期望。深到近黑嘅咖啡骨，可能賣相有啲唔討好，但味道絕對有特色。雖然稱為骨，但用上豬扒做，啖啖肉，加上質感好鬆化，部份邊位又有焦脆效果，叫人食得滿足；撒上少少杏仁片，除點綴一下，會唔會有種好似「飲」榛子咖啡嘅錯覺呢？而個汁嘅咖啡味道好濃香，個人稍嫌偏甜，事後向店員反映，原來個汁加入咗蘋果燜煮，若再稍微減少少甜度相信更適合大部份港人。見佢依次個新加坡風味菜做到10月尾，既然個咖啡骨咁有特色，希望正式放入大牌度，或再做長少少，等小弟可再帶朋友去試。
喇沙海鮮拉麵 $78晌大牌度又唔少拉麵選擇，招牌之一喺豬骨湯拉麵，亦有多款非豬骨湯拉麵，合共近20款，不過，既然期間限定嘅新加坡風味有一款喇沙拉麵，喺咪應該先試依個呢？
喇沙拉麵有配海鮮或鮮肉卷，前者賣$78，後者賣$58。湯底好壞喺個好決定嘅因素，而佢哋個喇沙湯底好香濃、帶少辣，個人稍嫌杰咗少少，但已經值得俾高分，故此，都差不多被小弟飲晒；至於麵條，可以見到晌廚房有師傅即場手打，新鮮度不用懷疑，粗幼度適中，入口好有咬口，咪睇佢好似細細碗，麵條查實有好多，而材料有鮮蝦、豆卜、溏心蛋，蝦隻爽彈，隻蛋嘅溏心效果不俗，不過，用「海鮮」有啲言過其實，改為喇沙鮮蝦拉麵會合宜啲。
高麗豆沙 $30一客有3件，炸得漲漲，糝上糖霜，好傳統嘅滬式甜點。個皮比較厚，但不失軟綿，豆沙蓉唔算好多，香蕉肉則比其他店相對多，兩者夾雜仍然清甜滋味。
晌枱上仲楝咗個「下午茶優惠」，睇住佢雞乸咁大個「五折」二字，超吸引，再睇條款及細則，都預咗只喺星期一至五下午茶時段供應，仲唔包假日；不過，半價優惠已涵蓋小籠包、點心、湯、涼菜、拉麵幾大類，實在非常吸引，啱晒輪班制嘅朋友、師奶們、有閒假多嘅人……，又唔使點等位，又有半價，超筍囉！
樂天皇朝唔單止8色小籠包有賣點，其他菜式又好食，久唔久又加啲新推介菜式嚟增加新鮮感，已諗定好下次舅仔生日飯就一於晌食度，因為佢喺食小籠包專員！
張貼
