Thai Fire

今日同老公去左觀塘工廈食泰國菜，餐廳位置方便，好近地鐵站。餐廳空間幾大，坐得好舒服。餐牌選擇亦非常多，老公發辦，有魚有肉有菜，仲有甜品添。泰火辣芥蘭菜苗：芥蘭炒得夠綠，咬落爽口，炸蒜蓉幾香，芥蘭苦中帶甜，唔太辣，幾惹味。炭燒豬頸肉：豬頸肉份量多，咬落軟熟，好香炭燒味，點埋泰式甜酸醬就更滋味。陰公鮮菌烤魚：烤魚幾大條，酥炸過，魚肉鮮嫩。雖然魚皮浸過湯，但皮咬落去係輕脆，另外菇份量都幾多。魚肉同菇吸晒冬陰公湯底精華，味道酸酸，唔太辣，開胃好味。泰綠鮮奶：綠茶味香，鮮奶味重，甜甜地，幾好飲。水果茶：勁大壺，裡面有西柚、百香果、檸檬同青檸，檸味濃，夠晒解渴。芒果糯米飯 (半份)：芒果幾甜，糯米飯剛剛蒸好，熱辣辣，口感煙韌，配埋旁邊椰汁一齊食好match。